പാനൂർ :കണ്ണംവെള്ളിയിൽ സി.പി.ഐ.എം ബ്രാഞ്ച് സെക്രട്ടറിയെയും പെരിങ്ങളം ലോക്കൽ കമ്മിറ്റിയംഗത്തെയും കോൺഗ്രസുകാർ അക്രമിച്ചതായി ആരോപണം.
കണ്ണംവെള്ളി സൗത്ത് ബ്രാഞ്ച് സെക്രട്ടറി വിപിൻ മനത്താനത്തിനെയും, ലോക്കൽ കമ്മിറ്റിയംഗം സി.എച്ച് ആദർശിനെയുമാണ് ആറംഗ സംഘം ബൈക്ക് തടഞ്ഞു നിർത്തി മർദ്ദിച്ചത്.
വെള്ളിയാഴ്ച ഉച്ചക്ക് രണ്ടു മണിയോടെ കണ്ണംവെള്ളി - കാട്ടിമുക്ക് റോഡിൽ പഞ്ചായത്ത് കിണറിന് സമീപം വെച്ചാണ് അക്രമം. പരിക്കു പറ്റിയ ഇരുവരെയും പാനൂർ താലൂക്കാശുപത്രി യിൽ പ്രവേശിപ്പിച്ചു.
കഴിഞ്ഞ ദിവസം കോൺഗ്രസുകാർ അണിയാരം എകരത്ത് ക്കണ്ടി ക്ഷേത്രത്തിൻ്റെ ബോർഡുകൾ ഇരുളിൻ്റെ മറവിൽ നശിപ്പിച്ച ശേഷം സിപിഐ എം ൻ്റെ തലയിൽ കെട്ടിവെക്കാൻ ശ്രമം നടത്തിയതായി നേതാക്കൾ പറയുന്നു.
എകെജി മന്ദിരത്തിൻ്റെ സമീപത്തുള്ള സിപിഐ എം പതാകകൾ നശിപ്പിക്കുകയും ചെയ്തിരുന്നു. സമീപത്തെ നിരീക്ഷണ ക്യാമറ പരിശോധിച്ചപ്പോഴാണ് ഇരു സംഭവങ്ങളിലും കോൺഗ്രസുക്കാരാണ് പ്രതികൾ എന്നു തിരിച്ചറിഞ്ഞത്.
ഈ വിഷയത്തിൽ ഡിസിസി പ്രസിഡൻ്റ് സന്തോഷ് കണ്ണം വെളളിയുടെ അനുജൻ ഐഎൻടിയുസി കൂത്തുപറമ്പ് മണ്ഡലം പ്രസിഡൻ്റും, കോൺഗ്രസ് പെരിങ്ങളം മണ്ഡലം ഭാരവാഹിയുമായ തയ്യുള്ളതിൽ ഷിജു കുമാർ ഉൾപ്പെടെയുള്ളവർക്ക് നേരെ ചൊക്ലി പൊലീസ് കേസെടുക്കുകയും ഷിജു കുമാറിനെ ചൊക്ലി പൊലീസ് ഇൻസ്പെക്ടർ കെവി മഹേഷിൻ്റെ നേതൃത്വത്തിൽ അറസ്റ്റു ചെയ്യുകയും ചെയ്തിരുന്നു.
ആർഎസ്എസ്സിൻ്റെ നേതൃത്വത്തിലുള്ള ക്ഷേത്രത്തിൻ്റെ ബോർഡുകൾ നശിപ്പിച്ചു സംഭവം സിപിഐ എം ൻ്റെ തലയിൽ കെട്ടിവെച്ചു പ്രദേശത്ത് ആർഎസ്എസ്സ് - സിപിഐ എം സംഘർഷമുണ്ടാക്കാനുള്ള ശ്രമം പരാജയപ്പെട്ടതോടെയാണ് കണ്ണം വെള്ളി പ്രദേശത്തെ കോൺഗ്രസ് ക്രിമിനലുകൾ സിപിഐ എം നേതാക്കളെ മർദ്ദിച്ചു വീണ്ടും അക്രമത്തിന് തുടക്കമിട്ടിരിക്കുന്നതെന്നാണ് ആരോപണം
