Zygo-Ad

100 ദിവസം പിന്നിട്ടിട്ടും ശിവസൂര്യയെ കണ്ടെത്താനായില്ല; ചൊക്ലിയിൽ ഇന്ന് പ്രതിഷേധ മാർച്ചും ധർണ്ണയും


ചൊക്ലി (കണ്ണൂർ): ഒരു നാടിന്റെ കാത്തിരിപ്പിനും കുടുംബത്തിന്റെ കണ്ണീരിനും 100 ദിവസം പിന്നിടുമ്പോഴും പ്ലസ് വൺ വിദ്യാർത്ഥി ശിവസൂര്യ എവിടെയെന്ന ചോദ്യത്തിന് ഉത്തരമില്ലാതെ ഇരുട്ടിൽ തപ്പുകയാണ് അന്വേഷണസംഘം. ചൊക്ലി രാമവിലാസം ഹയർ സെക്കൻഡറി സ്കൂൾ പ്ലസ് ടു വിദ്യാർത്ഥിയായ ശിവസൂര്യയെ കാണാതായ സംഭവത്തിൽ ക്രൈംബ്രാഞ്ച് അന്വേഷണം ഏറ്റെടുത്തിട്ടും ഇതുവരെ നിർണായക വിവരങ്ങളൊന്നും കണ്ടെത്താനായിട്ടില്ല. അന്വേഷണത്തിലെ വീഴ്ചകളും ഫലപ്രദമല്ലാത്ത നടപടികളും ഉയർത്തുന്ന ആശങ്കകൾക്കിടയിൽ നീതി തേടി ജനകീയ പ്രതിഷേധം ശക്തമാകുകയാണ്.

കഴിഞ്ഞ ആഗസ്റ്റ് എട്ടിനാണ് ശിവസൂര്യയെ വീട്ടിൽനിന്ന് കാണാതായത്. ആദ്യഘട്ടത്തിൽ വിവിധ അന്വേഷണങ്ങൾ നടന്നെങ്കിലും കുട്ടിയെ കണ്ടെത്താനായില്ല. പ്രാഥമിക അന്വേഷണത്തിലെ വീഴ്ചകളെക്കുറിച്ചും അന്വേഷണത്തിന്റെ രീതികളെക്കുറിച്ചും കുടുംബവും നാട്ടുകാരും നിരവധി പരാതികൾ ഉയർത്തിയിരുന്നു. ഒടുവിൽ കേസ് ക്രൈംബ്രാഞ്ചിന് കൈമാറിയെങ്കിലും ശിവസൂര്യയെക്കുറിച്ച് ഒരു സൂചനപോലും ലഭിക്കാത്തത് കുടുംബത്തെ കടുത്ത മാനസിക വേദനയിലാഴ്ത്തുകയാണ്.

ജനകീയ പ്രക്ഷോഭത്തിലേക്ക്:

ഈ സാഹചര്യത്തിലാണ് നിയമപരവും ജനാധിപത്യപരവുമായ പോരാട്ടം ശക്തമാക്കാൻ പുതിയ ആക്ഷൻ കമ്മിറ്റി രൂപീകരിച്ച് പ്രതിഷേധ പരിപാടികൾക്ക് തുടക്കം കുറിക്കുന്നത്. വിദ്യാർത്ഥികളെയും ബഹുജനങ്ങളെയും അണിനിരത്തി പ്രക്ഷോഭം വ്യാപിപ്പിക്കാനാണ് ആക്ഷൻ കമ്മിറ്റിയുടെ തീരുമാനം.

ഇതിന്റെ ഭാഗമായി ചൊവ്വാഴ്ച വൈകിട്ട് 4.30-ന് ചൊക്ലി രാമവിലാസം ഹയർ സെക്കൻഡറി സ്കൂൾ പരിസരത്തുനിന്ന് പ്രതിഷേധ മാർച്ച് ആരംഭിക്കും. കാഞ്ഞിരം ടൗണിൽ സമാപിക്കുന്ന മാർച്ചിന് ശേഷം നടക്കുന്ന പ്രതിഷേധ ധർണ്ണ എം.എൽ.എ ഉദ്ഘാടനം ചെയ്യും.

മുൻ മന്ത്രിമാരായ കെ.പി. മോഹനൻ, സി.പി.എം കണ്ണൂർ ജില്ലാ സെക്രട്ടറിയേറ്റ് അംഗം പി. ഹരീന്ദ്രൻ, എസ്.എഫ്.ഐ സംസ്ഥാന സെക്രട്ടറി പി.എസ്. സഞ്ജീവ്, ഡി.വൈ.എഫ്.ഐ ജില്ലാ സെക്രട്ടറി മുഹമ്മദ് അഫ്സൽ, ബാലാവകാശ കമ്മീഷൻ മുൻ ചെയർമാൻ അഡ്വ. മനോജ് കുമാർ, മുതിർന്ന അഭിഭാഷകൻ പി.എ. പൗരൻ തുടങ്ങിയവരും വിവിധ രാഷ്ട്രീയ പാർട്ടി നേതാക്കളും ജനപ്രതിനിധികളും ശിവസൂര്യയുടെ കുടുംബാംഗങ്ങളും പ്രതിഷേധത്തിൽ പങ്കെടുക്കും.

100 ദിവസം പിന്നിട്ടിട്ടും ഉത്തരം ലഭിക്കാത്ത ഒരു തിരോധാനത്തിന് മുന്നിൽ ഇനിയും മൗനം തുടരാനാകില്ലെന്ന ഉറച്ച നിലപാടിലാണ് നാട്ടുകാർ. ശിവസൂര്യയെ കണ്ടെത്തുക, അന്വേഷണത്തിലൂടെ ദുരൂഹതകൾ നീക്കുക, കുടുംബത്തിന് നീതി ഉറപ്പാക്കുക എന്നീ ആവശ്യങ്ങളുയർത്തി ചൊക്ലി ഇന്ന് സമരച്ചൂടിലാണ്.



വളരെ പുതിയ വളരെ പഴയ