പാനൂർ: പാനൂർ വള്ള്യായിലെ കൂടത്തിൽ മഠപ്പുരയിൽ തെയ്യം കെട്ടിനിടെ വൻ സംഘർഷം. ഇന്നലെ പോതിത്തിറ മഹോത്സവത്തിനിടെ വോളന്റിയർമാരും തെയ്യം കാണാനെത്തിയവരും തമ്മിലുണ്ടായ തർക്കമാണ് കൂട്ടത്തല്ലിൽ കലാശിച്ചത്. പോതി തെയ്യം, തിരുവപ്പന, വെള്ളാട്ടം തുടങ്ങിയ തെയ്യങ്ങൾ ക്ഷേത്രമുറ്റത്ത് നിൽക്കുമ്പോഴായിരുന്നു ഭക്തരെ ഞെട്ടിച്ച സംഭവങ്ങൾ അരങ്ങേറിയത്.
സംഭവത്തെ കുറിച്ച്:
ക്ഷേത്രമുറ്റത്തെ തിരക്ക് നിയന്ത്രിക്കാൻ വോളന്റിയർമാർ നൽകിയ നിർദ്ദേശം ഒരു വിഭാഗം പാലിച്ചില്ലെന്ന് ആരോപിച്ചാണ് തർക്കം തുടങ്ങിയത്. ഇത് പിന്നീട് വലിയ സംഘർഷമായി മാറുകയായിരുന്നു. ചേരിതിരിഞ്ഞുള്ള അടിപിടിക്കിടയിൽ തിരുവപ്പന തെയ്യത്തെ ആൾക്കൂട്ടം പിടിച്ചുതള്ളി. സംഘർഷത്തിൽ പെടാതെ മാറിനിൽക്കാൻ ശ്രമിക്കുന്ന തെയ്യം കലാകാരന്റെയും കൂട്ടത്തല്ലിന്റെയും ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
രാഷ്ട്രീയ തർക്കമെന്ന് ആരോപണം
സംഭവത്തിൽ രാഷ്ട്രീയമില്ലെന്നാണ് പൊലീസിന്റെ പ്രാഥമിക വിശദീകരണം. എന്നാൽ, സി.പി.എം - കോൺഗ്രസ് അനുഭാവികളാണ് ഇരുവിഭാഗങ്ങളിലായി തർക്കത്തിൽ ഏർപ്പെട്ടതെന്ന് നാട്ടുകാർ ആരോപിക്കുന്നു. പ്രദേശത്ത് വലിയ രീതിയിലുള്ള സംഘർഷാവസ്ഥയാണ് നിലനിന്നത്.
നിലവിൽ ആരും പരാതി നൽകാത്തതിനാൽ കേസെടുത്തിട്ടില്ലെന്ന് പാനൂർ പൊലീസ് അറിയിച്ചു.
സംഭവം വിവാദമായതോടെ ക്ഷേത്ര കമ്മിറ്റി അടിയന്തര യോഗം ചേർന്നു. തെയ്യത്തെ പിടിച്ചുതള്ളിയ സംഭവത്തിൽ വിശ്വാസികൾക്കിടയിൽ കടുത്ത പ്രതിഷേധമുണ്ട്. കേസെടുത്തിട്ടില്ലെങ്കിലും, ക്രമസമാധാന പ്രശ്നം കണക്കിലെടുത്ത് പാനൂർ പൊലീസ് പ്രദേശത്ത് നിരീക്ഷണം ശക്തമാക്കിയിട്ടുണ്ട്.
