പാനൂർ: കല്യാണ വീട്ടിലെ മാലിന്യങ്ങൾ അലക്ഷ്യമായി കത്തിച്ച വീട്ടുടമയ്ക്ക് കനത്ത പിഴ ചുമത്തി പഞ്ചായത്ത് അധികൃതർ. പാനൂരിനടുത്ത് ചെണ്ടയാട് കുനുമ്മൽ ഗുംട്ടിയിലെ ചോയിൻ്റവിടെ സി.വി. അലിക്കാണ് 5000 രൂപ പിഴ ശിക്ഷ വിധിച്ചത്.
കല്യാണ ആവശ്യങ്ങൾക്ക് ശേഷം അവശേഷിച്ച മാലിന്യങ്ങൾ നിശ്ചിത മാനദണ്ഡങ്ങൾ പാലിക്കാതെ പരസ്യമായി കത്തിച്ചതിനാണ് നടപടി. പഞ്ചായത്ത് രാജ് ആക്ട് 219 (N) പ്രകാരമാണ് ഈ നടപടി സ്വീകരിച്ചിരിക്കുന്നത്. ജില്ലാ എൻഫോഴ്സ്മെൻ്റ് വിഭാഗത്തിൻ്റെ കർശന നിർദ്ദേശത്തെത്തുടർന്ന് പഞ്ചായത്ത് സെക്രട്ടറി ഇൻ ചാർജ് എൻ.കെ. സാഗറാണ് പിഴ ചുമത്തിക്കൊണ്ടുള്ള ഉത്തരവിറക്കിയത്.
മാലിന്യ നിർമ്മാർജ്ജന നിയമങ്ങൾ ലംഘിക്കുന്നവർക്കെതിരെ കർശന നടപടി തുടരുമെന്ന് അധികൃതർ അറിയിച്ചു. ഹെൽത്ത് ഇൻസ്പെക്ടർ രജീന.സി, അസിസ്റ്റൻ്റ് സെക്രട്ടറി കെ.സജിന എന്നിവരുടെ നേതൃത്വത്തിലാണ് സ്ഥലത്ത് പരിശോധന നടത്തിയത്.
