കണ്ണൂർ: കുന്നോത്തുപറമ്പ് ഗ്രാമപഞ്ചായത്തിലെ കുടുംബാരോഗ്യ കേന്ദ്രം, ഹോമിയോ ഡിസ്പെൻസറി, ആയുർവേദ ഡിസ്പെൻസറി എന്നീ ആരോഗ്യ കേന്ദ്രങ്ങളെ ബന്ധിപ്പിച്ചു കെ.എസ്.ആർ.ടി.സിയുമായി കൈകോർത്തു നടപ്പിലാക്കുന്ന ഗ്രാമവണ്ടി സർവീസിന് തുടക്കമായി. പൊതുവിദ്യാഭ്യാസ മന്ത്രി എൻ. ഷംസുദ്ദീൻ പദ്ധതിയുടെ ഉദ്ഘാടനം നിർവ്വഹിച്ചു.
സംസ്ഥാനത്തെ ഗ്രാമീണ മേഖലകളിൽ പൊതുഗതാഗത സൗകര്യം വർദ്ധിപ്പിക്കുന്നതിന്റെ ഭാഗമായിട്ടാണ് സർക്കാരിന്റെയും ഗ്രാമപഞ്ചായത്തിന്റെയും സഹകരണത്തോടെ ഗ്രാമവണ്ടി സർവീസ് ആരംഭിച്ചത്. കണ്ണൂർ ജില്ലയിലെ രണ്ടാമത്തെയും തലശ്ശേരി കെഎസ്ആർടിസി ഡിപ്പോയിലെ ആദ്യത്തെയും ഗ്രാമവണ്ടി സർവീസാണ് കുന്നോത്തുപറമ്പിൽ പ്രവർത്തനം തുടങ്ങിയത്.
ചടങ്ങിൽ പി. കെ. പ്രവീൺ എം.എൽ.എ അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്റ് ഫസീല കെ, വൈസ് പ്രസിഡന്റ് കെ. പി. രാമചന്ദ്രൻ, കെഎസ്ആർടിസി കണ്ണൂർ ഡിടിഒ രഞ്ജിത്ത് പി. ഇ, വിവിധ ജനപ്രതിനിധികൾ, രാഷ്ട്രീയ പാർട്ടി പ്രതിനിധികൾ തുടങ്ങിയവർ പങ്കെടുത്തു.
ഗ്രാമവണ്ടി കടന്നുപോകുന്ന വിവിധ കേന്ദ്രങ്ങളിൽ പൗരാവലിയുടെ നേതൃത്വത്തിൽ ബാൻഡ് മേള അകമ്പടിയോടും മധുരപലഹാര വിതരണത്തോടും പടക്കം പൊട്ടിച്ചും ആവേശകരമായ സ്വീകരണമാണ് നൽകിയത്.
